*നമ്മുടെ കുടുംബങ്ങളെ പാപത്തിൽ നിന്നും, നിഷ്ക്രിയത്വത്തിൽ നിന്നും സംരക്ഷിക്കുക*
(ബാർ യൂഹാനോൻ റമ്പാൻ, പിറമാടം ദയറാ)
*PART - 1*
അവന് റാഹേലിനേയും പ്രാപിച്ചു. അവന് ലേയയേക്കാള്‍ അധികമായി റാഹേലിനെ സ്നേഹിച്ചു. വീണ്ടും വേറെ ഏഴു വര്‍ഷം അവന് അവനെ സേവിച്ചു. അവന് ലേയയെ വെറുക്കുന്നു എന്നു കര്‍ത്താവു കണ്ടപ്പോള്‍ അവളുടെ ഗര്‍ഭ പാത്രം തുറന്നു. റാഹേലോ വന്ധ്യയായിരുന്നു. ലേയാ ഗര്‍ഭിണിയായി, ഒരു മകനെ പ്രസവിച്ചു. അവള്‍ അവനു റൂബേല്‍ എന്നു പേരിട്ടു. ദൈവം എന്‍റെ കഷ്ടത കണ്ടു; ഇപ്പോള്‍ എന്‍റെ ഭര്‍ത്താവ് എന്നെ സ്നേഹിക്കും എന്ന് അവള്‍ പറഞ്ഞു. അവള്‍ വീണ്ടും ഗര്‍ഭംധരിച്ച് ഒരു മകനെ പ്രസവിച്ചു. ഞാന്‍ വെറുക്കപ്പെടുന്നു എന്നു കര്‍ത്താവു കേട്ടതിനാല്‍ ഇവനെയും എനിക്കു തന്നു എന്നു പറഞ്ഞ് അവള്‍ അവന് ശെമവൂന്‍ എന്നു പേരു വിളിച്ചു. അവള്‍ വീണ്ടും ഗര്‍ഭിണിയായി, ഒരു മകനെ പ്രസവിച്ചു. ഈ സമയം എന്‍റെ ഭര്‍ത്താവ് എന്നോടു ചേര്‍ച്ചയായിരിക്കുന്നു. ഞാന്‍ അവനു മൂന്നു പുത്രന്മാരെ പ്രസവിച്ചിരിക്കുന്നുവല്ലോ എന്നു പറഞ്ഞ് അവള്‍ അവന്നു ലേവി എന്നു പേരിട്ടു. അവള്‍ വീണ്ടും ഗര്‍ഭംധരിച്ച് ഒരു പുത്രനെ പ്രസവിച്ചു. ഈ സന്ദര്‍ഭത്തില്‍ ഞാന്‍ ദൈവത്തെ സ്തുതിക്കുന്നു എന്ന് അവള്‍ പറഞ്ഞു. അതിനാല്‍ അവള്‍ അവനെ യീഹൂദാ എന്നു പേരു വിളിച്ചു. പിന്നെ അവള്‍ക്കു പ്രസവം നിന്നു.
താന്‍ യാക്കോബിനു മക്കളെ പ്രസവിക്കുന്നില്ല എന്നു കണ്ടപ്പോള്‍ റാഹേല്‍ തന്റെ സഹോദരിയോട് അസൂയപ്പെട്ടു. അവള്‍ യാക്കോബിനോട്: എനിക്കു മക്കളെ തരിക; ഇല്ലെങ്കില്‍ ഞാന്‍ മരിക്കും എന്നു പറഞ്ഞു. അപ്പോള്‍ റാഹേലിന്റെ നേരേ യാക്കോബിനു കോപം ജ്വലിച്ചു. നിനക്കു ഗര്‍ഭഫലം വിരോധിച്ചിരിക്കുന്ന ദൈവത്തിന്‍റെ സ്ഥാനത്താണോ ഞാന്‍? എന്ന് അവന് ചോദിച്ചു.
അവള്‍ അവനോടു പറഞ്ഞത്: എന്‍റെ ദാസി ബില്‍ഹാ ഇതാ. നീ അവളുടെ അടുത്തു ചെല്ലുക. അവള്‍ എന്‍റെ മുമ്പാകെ പ്രസവിക്കുകയും അങ്ങനെ അവള്‍ മൂലം എനിക്ക് ആശ്വാസം ലഭിക്കുകയും ചെയ്യും. തന്റെ ദാസി ബില്‍ഹയെ അവള്‍ അവനു ഭാര്യയായി കൊടുത്തു.അവന് അവളുടെ അടുത്തു ചെന്നു. അവള്‍ ഗര്‍ഭംധരിച്ചു യാക്കോബിന് ഒരു മകനെ പ്രസവിച്ചു. ദൈവം എനിക്കു ന്യായം നടത്തിത്തന്നു. എന്‍റെ പ്രാര്‍ത്ഥന കേട്ട് എനിക്ക് ഒരുപുത്രനെ തന്നു എന്നു പറഞ്ഞു. ഇതുനിമിത്തം അവള്‍ അവനു ദാന്‍ എന്നു പേരു വിളിച്ചു. റാഹേലിന്റെ ദാസി ബില്‍ഹാ വീണ്ടും ഗര്‍ഭംധരിച്ചു യാക്കോബിന് ഒരു മകനെ പ്രസവിച്ചു. റാഹേല്‍ പറഞ്ഞു: എന്‍റെ സഹോദരിയോടു കൂടെ ഞാന്‍ മത്സരിച്ചു; എനിക്കു കിട്ടി. അവനു നഫ്താലി എന്നു പേരു വിളിച്ചു. തനിക്കു പ്രസവം നിന്നുപോയി എന്നു ലേയാ കണ്ടപ്പോള്‍ തന്റെ ദാസി സില്പയെ യാക്കോബിനു ഭാര്യയായി കൊടുത്തു. ലേയയുടെ ദാസി സില്പ യാക്കോബിനു ഒരു പുത്രനെ പ്രസവിച്ചു. എന്‍റെ ഭാഗ്യം വന്നു എന്നു ലേയാ പറഞ്ഞ് അവനു ഗാദ് എന്നു പേരു വിളിച്ചു. ലേയയുടെ ദാസി സില്പ യാക്കോബിന് രണ്ടാമത് ഒരു മകനെ പ്രസവിച്ചു. സ്ത്രീകള്‍ എന്നെ തീര്‍ച്ചയായും പ്രശംസിക്കും എന്നു ലേയാ പറഞ്ഞ് അവന് ആശീര്‍ എന്നു പേരിട്ടു. ഗോതമ്പു കൊയ്ത്തിന്‍റെ കാലത്തു റൂബേല്‍ വയലില്‍ പോയി ദൂദായി പഴം കണ്ടെത്തി, തന്റെ അമ്മ ലേയയുടെ അടുക്കല്‍ കൊണ്ടുവന്നു. നീ മകന്‍റെ ദൂദായി പഴത്തില്‍ നിന്ന് എനിക്കു കൂടെ തരിക എന്നു റാഹേല്‍ ലേയയോടു പറഞ്ഞു. ലേയ അവളോട്: എന്‍റെ ഭര്‍ത്താവിനെ കൂട്ടിക്കൊണ്ടു പോയതു നിനക്കു പോരായോ? എന്‍റെ മകന്‍റെ ദൂദായ് പഴവും വേണമോ? എന്നു ചോദിച്ചു. റാഹേല്‍ അവളോട്: നിന്‍റെ മകന്‍റെ ദൂദായി പഴത്തിനു വേണ്ടി അവന് ഈ രാത്രി നിന്നോടുകൂടെ ഉറങ്ങിക്കൊള്ളട്ടെ എന്നു പറഞ്ഞു. വൈകിട്ടു യാക്കോബ് വയലില്‍ നിന്നു വന്നപ്പോള്‍ ലേയാ അവനെ എതിരേല്പാന്‍ പുറപ്പെട്ടു ചെന്ന് ഇന്ന് എന്‍റെ അടുക്കല്‍ പ്രവേശിക്കുക. എന്തെന്നാല്‍ എന്‍റെ മകന്‍റെ ദൂദായി പഴത്താല്‍ ഞാന്‍ നിന്നെ കൂലിക്കെടുത്തിരിക്കുന്നു എന്നു പറഞ്ഞു. അവന് ആ രാത്രി അവളോടു കൂടെ ശയിക്കുകയും ചെയ്തു. ദൈവം ലേയയെ ചെവിക്കൊണ്ടു. അവള്‍ ഗര്‍ഭം ധരിച്ച് യാക്കോബിന് അഞ്ചാമത് ഒരു മകനെ പ്രസവിച്ചു. ഞാന്‍ എന്‍റെ ദാസിയെ എന്‍റെ ഭര്‍ത്താവിനു കൊടുത്തതു കൊണ്ട് ദൈവം എനിക്കു പ്രതിഫലം തന്നു എന്നു ലേയ പറഞ്ഞു. അവനു ഇസഖാര്‍ എന്നു പേരിട്ടു. ലേയാ വീണ്ടും ഗര്‍ഭം ധരിച്ച് യാക്കോബിനു ആറാമത് ഒരു മകനെ പ്രസവിച്ചു. ദൈവം എനിക്കു നല്ല സമ്മാനം തന്ന ഈ സമയം എന്‍റെ ഭര്‍ത്താവ് എന്നോടു പറ്റിച്ചേര്‍ന്നിരുന്നു. എന്തെന്നാല്‍ ഞാന്‍ അവന് ആറു പുത്രന്മാരെ പ്രസവിച്ചു എന്നു പറഞ്ഞ് അവള്‍ അവനു സബലൂന്‍ എന്നു പേരു വിളിച്ചു. പിന്നീട് അവള്‍ ഒരു മകളെ പ്രസവിച്ചു. അവള്‍ക്കു ദീനാ എന്നു പേരിട്ടു. ദൈവം റാഹേലിനെ ഓര്‍ത്ത് അവളെ ചെവിക്കൊണ്ട് അവളുടെ ഗര്‍ഭപാത്രം തുറന്നു. അവള്‍ ഗര്‍ഭം ധരിച്ച് ഒരു മകനെ പ്രസവിച്ചു. ദൈവം എന്‍റെ നിന്ദ നീക്കിക്കളഞ്ഞു എന്ന് അവള്‍ പറഞ്ഞു. ദൈവം എനിക്കു മറ്റൊരു മകനെ കൂടി തരും എന്നു പറഞ്ഞ് അവള്‍ അവനു യൗസേഫ് എന്നു പേരിട്ടു.
*(ഉല്പത്തി 29: 31-30: 24)*
നമ്മുടെ കുടുംബങ്ങളെ പാപത്തിൽ നിന്നും നിഷ്ക്രിയത്വത്തിൽ നിന്നും എങ്ങനെ സംരക്ഷിക്കാം?
യാക്കോബിന്റെ ജീവിതത്തെ പറ്റിയുള്ള വിവരണത്തിന്റെ ഈ ഭാഗത്ത്, അദ്ദേഹം രണ്ട് സഹോദരിമാരെ വിവാഹം കഴിയ്ക്കുന്നതും തുടർന്നുള്ള സംഭവങ്ങളും ആണ് വിവരിച്ചിരിക്കുന്നത്. അമ്മാവൻ ലാബന്റെ ഇളയ മകളായ റാഹേലിനെ വിവാഹം കഴിക്കാൻ യാക്കോബ് ഏഴു വർഷം ജോലി ചെയ്തു; എന്നിരുന്നാലും, വിവാഹ രാത്രിയിൽ, ലാബാൻ തന്റെ മൂത്ത മകളായ ലേയയെ യാക്കോബിന്റെ കൂടാരത്തിലേക്ക് യാക്കോബിനെ അറിയിക്കാതെ അയച്ചു. താൻ വഞ്ചിക്കപ്പെട്ടുവെന്ന് രാവിലെ യാക്കോബിന് മനസ്സിലായി. ലാബാനെ ചോദ്യം ചെയ്ത ശേഷം, റാഹേലിനെ വിവാഹം കഴിക്കാൻ യാക്കോബ്, വീണ്ടും ഏഴ് വർഷം കൂടി ജോലിചെയ്യേണ്ടിവരുന്ന ഒരു കരാറിലേർപ്പെട്ടു.
അതിനാൽ, ലേയയുമൊത്തുള്ള മധുവിധുവിന്റെ ഉത്സവങ്ങൾ പൂർത്തിയാക്കിയ ശേഷം, വീണ്ടും ഏഴു വർഷത്തെ അധ്വാനത്തിനു പകരമായി യാക്കോബിനു റാഹേലിനെ വിവാഹം കഴിക്കുവാൻ സാധിച്ചു. നിർഭാഗ്യവശാൽ, ഈ ഉടമ്പടി മൂലം, യാക്കോബ് കുടുംബജീവിതത്തിലുടനീളം ലേയയെ സ്നേഹിക്കാത്തതിലേക്ക് നയിച്ചു. ലേയയോ, തന്റെ ഭർത്താവായ യാക്കോബിനാൽ സ്നേഹിക്കപ്പെടണമെന്ന് അതിയായി കൊതിച്ചു, മക്കളെ പ്രസവിച്ചുകൊണ്ട് അവന്റെ ഹൃദയം നേടാൻ കഴിയുമെന്ന് അവൾ വിശ്വസിച്ചു. ദൈവം അവളുടെ സങ്കടം കണ്ടു അവൾക്ക് ധാരാളം മക്കളെ നൽകി. അവൾ ആദ്യം നാല് ആൺകുട്ടികളെ പ്രസവിച്ചു. അവൾ കുട്ടികൾക്ക് നൽകിയ പേരുകൾക്കൊപ്പം, ഭർത്താവ് തന്നെ സ്നേഹിക്കാത്തതിലുള്ള അവളുടെ നിരാശ അവൾ കാണിച്ചു. ലേയയുടെ മക്കളോടുള്ള അസൂയ കാരണം, റാഹേൽ (ദൈവം അവളുടെ ഗർഭപാത്രം അടച്ചിരുന്നു) യാക്കോബിന് അവളുടെ ദാസിയായ ബിൽഹയെ വിവാഹം കഴിക്കാനും കുട്ടികളെ പ്രസവിക്കാനും അവസരം നൽകി. ബിൽഹയിലൂടെ അവർക്ക് രണ്ട് ആൺകുട്ടികളുണ്ടായി. മറുപടിയായി, ലേയയും അതുതന്നെ ചെയ്തു, ദാസിയായ സിൽ‌പയിലൂടെ രണ്ട് ആൺകുട്ടികളുണ്ടായി. ദൈവം ലേയയെ വീണ്ടും രണ്ടു ആൺകുട്ടികളെയും ഒരു പെൺകുട്ടിയെയും നൽകി അനുഗ്രഹിച്ചു. ക്രമേണ, ദൈവം റാഹേലിന്റെ പ്രാർത്ഥന കേട്ടു, അവൾക്ക് ഒരു മകനെ നൽകി, യൗസേഫിനെ, ഈജിപ്തിന്റെ മേധാവിയായിത്തീർന്നപ്പോൾ, ഭാവിയിലെ ക്ഷാമത്തിൽ നിന്ന് കുടുംബത്തെ രക്ഷിക്കാൻ ദൈവം യാക്കോബിന് നൽകിയ സന്താനമായിരുന്നു യൗസേഫ് . പിന്നീട് റാഹേലിന് ഒരു മകൻ കൂടി ജനിച്ചു, അവന്റെ പേര് ബെന്യാമിൻ എന്നായിരുന്നു . ഈ പന്ത്രണ്ട് ആൺകുട്ടികളിൽ നിന്ന് ഇസ്രായേലിലെ പന്ത്രണ്ട് ഗോത്രങ്ങളും വന്നു.
ഈ കുടുംബത്തിന്റെ കഥ വളരെ കുഴപ്പം പിടിച്ച ഒന്നാണ്. അതിൽ പാപവും ദൈവത്തോടുള്ള അനുസരണക്കേടും നിറഞ്ഞിരിക്കുന്നു. ദൈവവുമായുള്ള ഉടമ്പടിയിലായിരുന്ന ഈ കുടുംബം ഇങ്ങെനെ ആയിരുന്നുവെങ്കിൽ അക്കാലത്തെ വിജാതീയ കുടുംബങ്ങൾ എത്ര മോശമായിരുന്നുവെന്ന് നമുക്ക് ഊഹിക്കാവുന്നതേയുള്ളൂ.ദുഃഖകരമെന്നു പറയട്ടെ, ഇന്ന് നമ്മുടെ സഭയിലെ ചില കുടുംബങ്ങൾക്കിടയിൽ ഇത് അസാധാരണമല്ല. അവർ പരസ്പരം സമാധാനവും സ്നേഹവും നിറഞ്ഞവരായി പുറമെ കാണപ്പെടുമെങ്കിലും, അവ പലപ്പോഴും പ്രവർത്തനരഹിതമാണ്.
തിരുവെഴുത്തിലെ മിക്ക ചരിത്ര വിവരണങ്ങളെയും പോലെ, ഈ കഥയും വിവരണാത്മകമാണ്. എന്താണ് സംഭവിച്ചതെന്നതിനേക്കാൾ ഉപരിയായി, എന്താണ് സംഭവിക്കേണ്ടിയിരുന്നത് ഈ വിവരണങ്ങൾ നമ്മെ പഠിപ്പിക്കുന്നു. മിക്കപ്പോഴും, തിരുവെഴുത്തുകളിലെ വീരനായകന്മാരുടെ ന്യൂനതകൾ നിറഞ്ഞ ഉദാഹരണങ്ങളിൽ നിന്ന് പഠിക്കാൻ നാം ചിലപ്പോൾ നിർബന്ധിക്കപ്പെടുന്നു. നമ്മുടെ ജീവിതത്തിനായി ദൈവത്തിൻറെ ഏറ്റവും മികച്ചത് നഷ്‌ടപ്പെടുത്തരുതെന്ന് നമ്മെ വിളിച്ചറിയിക്കുന്ന മുന്നറിയിപ്പുകളായി അവ പ്രവർത്തിക്കുന്നു. ദൈവം ഇസ്രായേലിനെ മരുഭൂമിയിൽ ശിക്ഷിച്ചതെങ്ങനെ എന്നതിനെക്കുറിച്ച് സംസാരിക്കുമ്പോൾ പൗലോസ് പറഞ്ഞു: "അവര്‍ മോഹിച്ചതു പോലെ തിന്മകളെ നാം മോഹിക്കാതിരിക്കേണ്ടതിന് അവര്‍ നമുക്ക് പാഠമായിത്തീര്‍ന്നിരിക്കുന്നു." (1 കോറി 10: 6). അതുപോലെ, യാക്കോബിന്റെ പ്രവർത്തനരഹിതമായ കുടുംബത്തിന്റെ കഥ പഠിക്കുന്നതിലൂടെ, നമ്മുടെ കുടുംബങ്ങളിലോ ഭാവി കുടുംബങ്ങളിലോ പാപവും നിഷ്ക്രിയത്വവും എങ്ങനെ ഒഴിവാക്കാമെന്ന് നമ്മൾ പഠിക്കുന്നു.
നമ്മുക്ക് അൽപ്പ സമയം ധ്യാനിക്കാം ; യാക്കോബിന്റെ കുടുംബത്തിന്റെ ദാരുണമായ കഥ പരിഗണിക്കുമ്പോൾ, നമ്മുടെ കുടുംബങ്ങളെ പാപത്തിൽ നിന്നും നിഷ്ക്രിയത്വത്തിൽ നിന്നും സംരക്ഷിക്കുന്നതിനെക്കുറിച്ച് നമുക്ക് എന്ത് തത്ത്വങ്ങൾ പഠിക്കാം?
*A) നമ്മുടെ കുടുംബങ്ങളെ സംരക്ഷിക്കുന്നതിന്, നാം നമ്മുടെ പൂർവ്വികരുടെ പാപങ്ങളെ അനുകരിക്കരുത്.*
(ദയവായി ഉല്പത്തി 29:31 മുതൽ 30:3 വരെയുള്ള ഭാഗങ്ങൾ മുകളിൽ കൊടുത്തിരുന്നത് വായിക്കുക.)
യാക്കോബിന് റാഹേൽ പ്രിയങ്കരിയായതിനാൽ, ലേയയ്ക്ക് ഏകാന്തതയും ഭർത്താവിന് തന്നോട് സ്നേഹവുമില്ലെന്ന് തോന്നി. അതിനാൽ, അവൾക്ക് തന്റെ ഇളയ സഹോദരി റാഹേലിനോട് അസൂയ തോന്നി. ലേയയ്ക്ക് മക്കളുണ്ടാകാൻ തുടങ്ങിയപ്പോൾ, പ്രതികരണമായി റാഹേലിന് മൂത്തസഹോദരിയോടും അസൂയ തോന്നി. ഒരു ദേശീയ ആയുധ മൽസരത്തിന് സമാനമായി, ഈ സഹോദരിമാർക്ക് ഇടയിൽ ഒരു സന്താന വർദ്ധന മത്സരം ഉണ്ടായിരുന്നു. ജനിക്കുന്ന ഓരോ കുട്ടിയും ഇരുവർക്കും തന്റെ സഹോദരിക്കെരെ ഉള്ള ഒരു ആയുധം ആയിരുന്നു. യാക്കോബിന്റെ സ്നേഹം തങ്ങളിൽ കേന്ദ്രീകരിച്ചു കൊണ്ട് തങ്ങളെ സുരക്ഷിതമാക്കുന്നതിൽ സന്താന വർദ്ധനവ് നേട്ടമുണ്ടാകുമെന്ന പ്രതീക്ഷയിൽ ആ കുടുംബത്തിൽ കുഞ്ഞുങ്ങൾ ജനിച്ചു. അനാരോഗ്യകരവും വിഷലിപ്തവുമായ ഒരു വീടായിരുന്നു അത്.
സ്വാഭാവികം എന്ന് പറയട്ടെ, യാക്കോബ് വളർന്നുവന്ന ഗാർഹിക അന്തരീക്ഷവും ഇതിന് സമാനമായിരുന്നു (ഉൽപ. 25, 27). അവന്റെ പിതാവായ യിസ്ഹാക്ക് ഏശാവിനെ അനുകൂലിച്ചു. യാക്കോബിന്റെ അമ്മ റിബേക്ക അവനെ അനുകൂലിച്ചു. ആർക്കാണ് ജന്മാവകാശം ലഭിക്കുക എന്ന കാര്യം വന്നപ്പോൾ കുടുംബം പിരിഞ്ഞു. യിസ്ഹാക്കും ഏശാവും ഒരു ടീമിലും റിബേക്കയും യാക്കോബും ഒരു മറ്റൊരു ടീമിലുമായിരുന്നു. റിബേക്കയും യാക്കോബും ഒടുവിൽ യാക്കോബിന് ജന്മാവകാശം നേടുവാൻ ഇസ്സഹാക്കിനെ വഞ്ചിച്ചു. യാക്കോബിന്റെ മാതാപിതാക്കൾ പക്ഷപാതം കാണിക്കുകയും അത് കുട്ടികളെ ഭിന്നിപ്പിക്കുകയും ചെയ്തു. അതുപോലെ, യാക്കൊബ് തന്റെ ഭാര്യമാരെ ഭിന്നിപ്പിക്കുന്ന പക്ഷപാതം കാണിച്ചു. ക്രമേണ, അവൻ തന്റെ കുട്ടികളോട് പക്ഷപാതം കാണിക്കുകയും, റാഹേലിന്റെ മൂത്തമകൻ യൗസേഫിനെ അനുകൂലിച്ച്, മറ്റ് സഹോദരന്മാർ അവനെ വെറുക്കുകയും അടിമത്തത്തിലേക്ക് വിൽക്കുകയും ചെയ്യുന്നതിന് കാരണമുണ്ടാക്കുകയും ചെയ്തു.
പക്ഷപാതം കാണിച്ച് മത്സരാധിഷ്ഠിതമായ ഒരു കുടുംബ ജീവിതത്തിലേക്ക് സ്വയം നയിച്ചുകൊണ്ട്, യാക്കോബ്, തന്റെ മാതാപിതാക്കളുടെ പാപങ്ങൾ പരിശീലിപ്പിക്കുക മാത്രമല്ല, മുത്തച്ഛനായ അബ്രഹാമിനെയും സഹോദരൻ ഏശാവിനെയും പോലെ ഒന്നിലധികം ഭാര്യമാരെ വിവാഹം കഴിക്കുകയും ചെയ്യുന്നു. ഈ രണ്ട് സാഹചര്യങ്ങളിലും ബഹുഭാര്യത്വ വിവാഹങ്ങൾ വീട്ടിൽ ഭിന്നതയുണ്ടാക്കി. ദുഃഖകരമെന്നു പറയട്ടെ, യാക്കോബ് തന്റെ കുടുംബത്തിലെ പൂർവ്വികരുടെ പാപങ്ങൾ ആവർത്തിച്ചു.
ഈ പാപങ്ങൾ ആത്യന്തികമായി കുട്ടികളുടെ ജീവിതത്തിൽ നാശമുണ്ടാക്കുന്നു. മുൻപ് സൂചിപ്പിച്ചതുപോലെ, മുതിർന്ന സഹോദരങ്ങൾ യൗസേഫിനെ അടിമത്തത്തിലേക്ക് വിൽക്കുകയും, യോസേഫ് മരിച്ചുവെന്ന് യാക്കോബിനോട് കള്ളം പറയുകയും ചെയ്യുന്നു. വേദശാസ്ത്ര നിപുണനായ F.B. മേയർ ഇതിനെക്കുറിച്ച് പറഞ്ഞു:
"അപ്പോൾ കുട്ടികൾ വന്യവും ചീത്തയും ആയി വളർന്നതിൽ അതിശയിക്കാനുണ്ടോ? രൂബേൻ, വെള്ളം പോലെ അസ്ഥിരനും, ആവേശവും വികാരഭരിതവുമായവൻ: ശിമയോൻ, അനുസരനായുള്ളവൻ പക്ഷെ എന്നാൽ നിരാശാജനകമായ ക്രൂരത ഉള്ളവൻ ; അവന്റെ കുറ്റകൃത്യത്തിൽ പങ്കാളിയായ ലെവി. കുട്ടികൾ മോശമായി മാറ്റപ്പെടുന്ന അവസ്ഥയിൽ അവരുടെ ബാല്യകാലമാകുന്ന മനോഹരമായ കവാടം അവരെ പക്വതയുള്ള ജീവിതമാകുന്ന മനോഹര ദൈവാലയത്തിലേക്കു നയിക്കില്ല. അതിന് കാരണം പൊതുവായി കുടുംബ ജീവിതത്തിലെ പരിശീലനത്തിന്റെ പിഴവാണ്. കുഞ്ഞുങ്ങളെ പഠിപ്പിക്കുന്ന മൂല്യങ്ങളിലേക്കാൾ വ്യത്യസ്തമായി പലപ്പോഴും അവർ കുടുംബത്തിൽ കാണുന്നതിന്റെ ആകെ ഫലമാണിതിന് കാരണം. യാക്കോബ് എന്തുതന്നെയായാലും, അവന്റെ മാതൃക ഏറ്റവും മികച്ചതല്ലെന്ന് ഞാൻ ഭയപ്പെടുന്നു, സ്ത്രീകളുടെ കൂടാരങ്ങളിൽ ലഭിച്ച മതിപ്പ്, ഉയർന്ന വാക്കുകളും മോശം അഭിനിവേശവും, ഏതൊരു കുട്ടിയെയും നശിപ്പിക്കാൻ പര്യാപ്തമാണ്. നിങ്ങൾ വീട്ടിൽ എങ്ങനെ പ്രവർത്തിക്കുന്നുവെന്ന് സൂക്ഷിക്കുക. ചെറിയ കണ്ണുകൾ നിങ്ങളെ നിരീക്ഷിക്കുന്നത് ഓർക്കുക; ഏത് അവർ കാണുന്നുവോ തികഞ്ഞ അനുകരണത്തിലൂടെ അവർ അത് ആവർത്തിക്കും."
ദുഃഖകരമെന്നു പറയട്ടെ, ഇത് പലപ്പോഴും നമുക്കും ശരിയാണ്. നമ്മിൽ ആർക്കും തികഞ്ഞ മാതാപിതാക്കളോ കുടുംബങ്ങളോ ഇല്ല, പൂർവ്വികർ ചെയ്ത പാപങ്ങൾ നമ്മളും ആവർത്തിക്കുന്നു, അതിനെ കുടുംബത്തിൽ സ്വീകരിക്കുന്നു. പുറപ്പാടു 20: 5-6 ൽ ദൈവം പറഞ്ഞു: "ഞാനാകുന്നു നിന്‍റെ ദൈവമായ കര്‍ത്താവ്. എന്നെ ദ്വേഷിക്കുന്നവരുടെ മൂന്നാമത്തെയും നാലാമത്തെയും തലമുറകളിന്മേല്‍ വരെ,
പിതാക്കന്മാരുടെ കടങ്ങള്‍ക്ക് മക്കളുടെമേല്‍ പ്രതികാരം ചെയ്യുന്ന തീഷ്ണതയുള്ള ദൈവമാകുന്നു ഞാന്‍. എന്നെ സ്നേഹിക്കുന്നവര്‍ക്കും എന്‍റെ കല്പനകള്‍ പാലിക്കുന്നവര്‍ക്കും ആയിരം തലമുറകള്‍വരെ ഞാന്‍ കൃപ ചെയ്യുന്നു."
നമ്മളുടെ കുടുംബത്തിന്റെ പാപങ്ങൾക്ക് ദൈവം നമ്മെ ശിക്ഷിക്കുന്നില്ല; എന്നിരുന്നാലും, മാതാപിതാക്കളുടെ പാപങ്ങൾ മൂന്ന് നാല് തലമുറകളായി എങ്കിലും നിലനിൽക്കുന്നതായി വിശുദ്ധ ഗ്രന്ഥം നമ്മെ കാണിക്കുന്നു. നമ്മുടെ ജീവിതത്തിൽ നിന്നും കുടുംബ പാപങ്ങൾ ലംഘിക്കുന്നത്/ ഒഴിവാക്കുന്നത് എത്രത്തോളം ബുദ്ധിമുട്ടാണെന്ന് ഇത് കാണിക്കുന്നു. മദ്യപാനം, വിവാഹമോചനം, കുട്ടികളെയോ ജീവിത പങ്കാളിയെയോ അവഗണിക്കുക, ദുരുപയോഗം, ഭൗതികവാദം, മന്ത്രവാദം തുടങ്ങിയവ ഉണ്ടാകുമ്പോൾ, ഇവ തലമുറകളിലേക്ക് കൈമാറ്റം ചെയ്യപ്പെടുന്നു. എന്നാൽ ദൈവകൃപയാൽ, ക്രിയാത്മകമായ കുടുംബ വിശ്വസ്തത തകർക്കപെടുന്നില്ല, മാത്രമല്ല കുടുംബത്തിൽ ഉള്ള വിശ്വസ്തത ആയിരക്കണക്കിന് തലമുറകൾ നീണ്ടുനിൽക്കുമെന്നു വചനം നമ്മെ പഠിപ്പിക്കുന്നു.
മിക്കപ്പോഴും വിവാഹത്തിനു മുമ്പുള്ള കൗൺസിലിംഗിലൂടെ കടന്നുപോകുമ്പോൾ,
മാതാപിതാക്കളുടെ വിവാഹവും രക്ഷാകർതൃത്വവും വിലയിരുത്തി ആയതിലെ
നല്ലതും ചീത്തയും ആയ വശങ്ങൾ തിരിച്ചറിയുന്നതിനായി വധൂവരന്മാരെ വിളിക്കുന്നു. ഇങ്ങനെ ചെയ്യുന്നത് വഴി തങ്ങളുടെ കുടുംബത്തിൽ തുടരേണ്ടതും അല്ലാത്തതും എന്താണെന്ന് അവർക്ക് തീരുമാനിക്കാൻ കഴിയും. പലരും ഒരിക്കലും അവരുടെ കുടുംബത്തിന്റെ പാപസാഹചര്യങ്ങളെ വിമർശനാത്മകമായി വിലയിരുത്തുന്നില്ല, അതിനാൽ അവ ആവർത്തിക്കപ്പെടുകയും കുടുംബം ആത്മീയ വളർച്ച പ്രാപിക്കാതിരിക്കുകയും ചെയ്യുന്നു. പ്രീ - മാരിറ്റൽ കൗൺസിലിംഗ് സംവിധാനം തന്നേ ഇപ്പോൾ സഭയിൽ ചിലയിടങ്ങളിലെങ്കിലും കേവലം പണസമ്പാദനത്തിനും, പ്രഹസനപരമായ നടത്തിപ്പിലും ആയിരിക്കുന്നു. പ്രീ - മാരിറ്റൽ കൗണ്സിലിംഗിന്റെ അത്യാവശ്യം ബോധ്യപ്പെടാത്തവരിൽ വൈദികരും ഉൾപ്പെടുന്നു എന്നതാണ് ഏറെ ദുഖകരം. മറ്റൊരു സംഗതി കൂടി ഇവിടെ പ്രസ്താവിക്കേണ്ടത് ആവിശ്യം എന്ന് കരുതുന്നു. കൗൺസിലർ ആരായിരിക്കണം എന്നത് പ്രാധാന്യം അർഹിക്കുന്ന ഒരു വിഷയം ആണ്. ഇന്ത്യൻ റീഹാബിലിറ്റേഷൻ കൌൺസിലിന്റെ നിയമം അനുസരിച്ചു സൈക്കോളജിയിലോ, സോഷ്യൽ വർക്കിലോ ബിരുദാനന്തര ബിരുദം കരസ്ഥമാക്കിയ ശേഷം R.C.I അംഗീകൃത സ്ഥാപനങ്ങളിൽ വിദഗ്ധരുടെ കീഴിൽ മൂന്നു വർഷം പ്രവർത്തന പരിചയം നേടിയിട്ടുള്ള ഒരാൾക്ക്‌ മാത്രം ആണ് യഥാർത്ഥത്തിൽ ഇന്ത്യൻ നിയമം അനുസരിച്ച് കൌൺസിലിംഗ് നടത്തുവാനുള്ള അവകാശം. ഇത് സഭയിൽ പ്രവർത്തികമാക്കുമ്പോൾ ഒന്നുകിൽ ഇത്തരം വിദഗ്ദ്ധരുടെ മേല്നോട്ടത്തിൽ ആത്മീയേതരമേഖലയിലും പരിചയസമ്പന്നനായ പട്ടക്കാരന്റെ മേൽനോട്ടത്തിൽ ആത്മീയ വിഷയങ്ങളിലും കൗണ്സിലിംഗ് നടത്തുന്നതാണ് ഉത്തമം.
കൂടാതെ മേൽപ്പറഞ്ഞ യോഗ്യത നേടിയവരെ അത്യാവശ്യം വേണ്ട വേദശാസ്ത്ര പരിശീലനം കൊടുത്തു വൈദികരാക്കിയാൽ ഈ മേഖലയിൽ സഭയ്ക്കു നേട്ടങ്ങൾ ഉണ്ടാകും. ആത്യന്തികമായ ലക്ഷ്യം വിശ്വാസിയുടെയും അയാൾ അംഗമായിരിക്കുന്ന കുടുംബത്തിന്റെയും രക്ഷ ആണല്ലോ.
നമുക്കു ധ്യാനിക്കാം ; എന്തൊക്കെ കുടുംബ പാപങ്ങളാണ് പൂർവികർ നമ്മൾക്ക് കൈമാറിയത്? നാം എന്തൊക്കെ പാപങ്ങളാണ് കുടുംബത്തിൽ ചെയ്യുന്നത്? അത് അവസാനിപ്പിക്കേണ്ടതുണ്ട്, അതിനാൽ അവ ഭാവിതലമുറയുടെ അനുഗ്രഹത്തിന് തടസ്സമാകില്ല. നിങ്ങളുടെ കുടുംബത്തിന്റെ ഹ്രസ്വകാല / തലമുറ പാപങ്ങൾ എന്തൊക്കെയാണ്? നിങ്ങളുടെ ജീവിതത്തിൽ ഇവയുടെ സാമീപ്യം നിങ്ങൾ എങ്ങനെ മനസ്സിലാക്കുന്നു? പൂർവികർ കൈമാറിയ കുടുംബ അനുഗ്രഹങ്ങൾ ഏത് വിധത്തിലാണ് നിങ്ങൾ അനുഭവിച്ചത്? വരും തലമുറയ്ക്ക് കൈമാറുവാൻ നിങ്ങൾ സമ്പാദിച്ച അനുഗ്രഹങ്ങൾ എന്തൊക്കെയാണ്?
No comments